علاقة حسام حسن ب محمد صلاح … ملف شائك لمنتخب مصر

‏من اللحظة اللي تم تعيين حسام حسن فيها قولت في ملف شائك جداً اسمه علاقة حسام حسن بصلاح تجاهل الملف ده هو انكار لواقع هيتسبب في تأثير سلبي وأكشن كتير

‏صلاح مش أكبر من منتخب مصر ده شيء مفروغ منه بس كمان صلاح هو أعظم محترف في تاريخ كرة القدم المصرية . مش عايز أقف عندك أرقام صلاح مع ليفربول رغم إنها إعجازية بس هقف عند أرقام صلاح مع المنتخب صلاح تواجد في تشكيل أمم افريقيا ٢٠١٧ و ٢٠٢١ وقاد المنتخب للوصول لنهائي البطولتين . قاد مصر للوصول لكأس العالم في روسيا ٢٠١٨ وكان هداف التصفيات وسجل هدفين الصعود في شباك الكونغو وسجل هدفين في كأس العالم . الهداف التاريخي لمصر في تصفيات أمم إفريقيا و تصفيات كأس العالم وتاني هداف للمنتخب على مر تاريخه بعد حسام حسن

‏طيب تعالى اسألك يا فارس هل ده او أي شيء تاني يدي مبرر لصلاح انه يتكبر على المدير الفني للمنتخب ؟ . الإجابة أكيد لا . بس دي نص الحكاية لو عايزين بجد نكون منصفين لازم نحكي الحكاية كاملة

‏صلاح تعرض لنقد قاسي جدا من حسام حسن وابراهيم حسن قبل تعيينهم ولازم نعترف إن النقد كان فيه جزء خارج سياق الكورة وفيه سخرية من صلاح زي جملة ابراهيم حسن الشهيرة ” ربنا يجعله في ميزان حسناته ” او كلام كابتن حسام في قصة تغيير صلاح من عدمه وكإن ده المقياس لنجاح او شخصية المدرب . غير تصريح زي لا اتمنى إن صلاح يتخطى عدد أهداف حسام حسن مع المنتخب .

‏فالأول الناس تجاهلت أمور محتاجة ان يتم ترتيب جلسة بين المدير الفني وكابتن المنتخب واتعاملنا بمبدأ كله بالحنية بيفك . فوصلنا لعدم تواصل صلاح مع جهاز المنتخب . ثم تصريح زي تريزيجية الجدع ابن البلد جه رغم ان عنده ماتش واكيد الاسقاط مفهوم . ثم تصريح حسام عن الغيابات وتجاهل صلاح اللي بديهي لو بنحل كان يتقال إن غياب صلاح كان أهم عامل سلبي في مواجهة منتخب بحجم كرواتيا اول تصريح له كان كنا نتمنى مواجهة صلاح